Formasaun ba arbitu sira loron lima ensera ho rezultadu ne’ebé admiradu, nain-rua husi partisipante-29 maka pasa iha teste fízika, ne’ebé hala’o direita husi formadór sira FIFA nian. Januario Salsinha no Henrique Martins Pereira mak pasa iha teste ne’e rasik.
Iha enseramentu ohin (12/09/22), Gregorio Correia – Sekretáriu-Jerál FFTL, enkoraja partisipante sira soi nafatin vontade hodi aprende liutan no kuida estamina nune’e bele pasa iha teste sira iha futuru. Tannba programa ne’e anuál, ne’ebé sempre hala’o husi FIFA hodi hetan arbitu sira foun.
Iha arbitrajen rekere kualidade iha aspeitu fíziku no koñesimentu. Individu ne’ebé iha kapasidade fízika no koñesimentu di’ak iha arbitrajen bele kualifika ba arbitu internasionál – ida ne’ebé FIFA rasik sei sertifika hodi hetan kompeténsia lidera jogu internasionál. Iha tinan ne’e nain-rua de’it hakat liu prosesu ne’e no hetan sertifikasaun.
FFTL konvida formadór Arbitru FIFA nian liuhusi AFC ne’ebé mak fó formasaun ba arbitru sira durante semana ida. Formasaun ida-ne’e inklui aprezentasaun materia no mós teste fízika ba arbitru sira.
FIFA liuhusu programa dezenvolvimentu arbitrajen kontinua fó asisténsia ba dezenvolve arbitru iha asosiasaun membru sira, nune’e bele lidera kompetisaun ne’ebé asosiasaun membru sira organiza iha nivel nasionál no mós rejionál.
FFTL kontinua halo esforsu atu kontinua promove arbitru nasionál ba iha nivel rejionál liuhusi eleva koñesimentu hodi lidera kompetisaun sira iha nivel rejionál hodi manan liutan esperiénsia.
Oras ne’e arbitru nasionál nain-rua mak promividu ba iha FIFA Referee, ne’ebé bele lidera jogu sira internasionál – iha rejiaun no mós mundiál.
