FFTL-LFTL ENKONTRU OHIN KONKLUI LIGA 2022

Dili – 12 Setembru 2022.

FFTL no LFTL hasoru malu ohin hodi diskute no diside Liga ne’ebé planea realiza iha tinan ne’e.

Parte rua to’o iha konkluzaun ida hodi deside seida’uk bele realiza tanba orsamentu ne’ebé iha seida’uk sufisiente hodi organiza Liga, maibé parte rua sei aprezenta fila-fali ba iha Governu hodi oinsa bele tan suporta fundu, nune’e bele realiza iha tinan ne’e.

“Ida-ne’e maka ami-nia desizaun. Ami sei ba hasoru Sekretáriu Estadu Juventude no Desportu, no sei fó sai ba públiku oinsá Liga ne’e no ami mós hakarak tenke la’o iha tempu badak.” Dehan Prezidente FFTL Francisco Jeronimo ohin.

FFTL – LFTL mós konsidera ejizénsia klubu sira nian no sei aprezenta iha Governu hodi hamutuk buka solusaun. Parte rua mós mantein ho komitmentu atu realiza Liga iha tinan ne’e maske iha difikuldade finanseiru.

“Ami iha komprimisu hanesan atu tempu badak futebol ne’e tenke la’o, maibé infelizmente ita iha hela situasaun ida – falta de orcamento – atu realiza atividade ne’e. Nune’e Prezidente FFTL iha hanoin ida atu halo audiénsia ida ho SEJD para atu haree took posibilidade sira-ne’e.” Afirma, Nilton Gusmão – Prezidente LFTL.

Prezidente LFTL mós deklara, planu orsamentu ba Liga nian aprezenta tiha ona no FFTL mós kontribui, maibé lasufisiente tanba la-kobre ejizénsia klubu sira nian.

Klubu sira ejize tenke iha subsidiu hodi rekupera sira-nia kondisaun finanseiru, no LFTL halo esforsu atu responde ho angariasaun maibé nafatin iha situasaun hanesan.

Nune’e FFTL – LFTL sei tuur hamutuk fali ho SEJD hodi haree posibilidade sira oinsa bele realiza Liga.