Prezidente FFTL Hasoru Prezidente AFC

Malazia, 24 Outobru 2022 – Prezidente FFTL Francisco Jeronimo hasoru Prezidente AFC Shaikh Salman bin Ebrahim Al Khalifa, iha kapitál Malazia, hodi diskute asuntu importante sira kona-ba futebol.

Nu’udar hatete iha sítiu AFC, iha sorumutu ne’e Shaikh Salman atualiza programa sira foun AFC nian ne’ebé inklui aspeitu sira ba jogu no mós kompetisaun, no enkoraja FFTL aproveita hodi kontinua dezenvolve futebol iha Timor-Leste.

Diskusaun ne’e foka liuba oportunidade no dezafiu sira ne’ebé FFTL hasoru, AFC husu atu hasa’e partisipasaun iha jogu sira tuir grupu idade ne’ebé eziste iha kompetisaun.

“Ha’u kontente haree partisipasaun Timor-Leste nian, tuir grupu idade, ba ekipa sira ne’ebé partisipa iha Ita-nia kompetisaun kontinentál, tanba ne’e hatudu katak dezenvolvimentu futebol iha dalan loos iha Prezidente Francisco Jeronimo nia lideransa, no fó esperansa tebtebes ba futuru,” Hateten Salman.

FFTL kontinua envolve ativa ho AFC, kolabora di’ak liutan,  hodi hasa’e patraun jogu hodi identifika solusaun  ne’ebé sustentavel no bele enfrenta obstakulu sira.

Prezidente Jeronimo, iha nia parte, enfasiza katak asistensia AFC nian ne’e importante ba Timor-Leste, iha ne’ebé futebol nu’udar dezportu ida-ne’ebé popular, ho jogadór ne’ebé ladun barak maibé talentozu no iha esperansa.

Jeronimo mós louva apoiu sira liuhusi AFC nia tékniku sira no programa dezenvolvimentu sira ne’ebé ajuda  Timor-Leste nia futebol hodi hasa’e kualidade no hetan konfiansa.

FFTL sai membru ba AFC iha tinan 2002 no sai ona membru ativu nu’udar familia ba Futebol Aziátiku.