Nilda Romana, Markador Topu Iha Taxa RMB 2022

Nilda Romana nu’udar jogadora atakante iha Klube Buibere, ne’ebé sai markador topu iha jogu Taxa Rosa Muki Bonaparte epoka 2022. Jogadora atakante númeru 13 ne’e rekolla golu 15 durante jogu sira iha epoka ne’e.

La’ós ne’e de’it, Romana mós konsege lori Klube Buibere sai kampiaun iha Liga Feto Timor no Taxa RMB ne’ebé Federasaun Futebol Timor-Leste organiza iha tinan 2020. Romana marka istória daduluk iha istoria futebol feto Timor-Leste nian, ne’ebé alein lori nia ekipa ba kampiaun, sai mós jogadora di’ak liu iha torneiu nivel nasionál.

Romana ne’ebé hahu nia kareira futebol ho AD SLB hetan prestasaun di’ak no kontinua hasa’e abilidade futebol liuhusi envolve iha atividade sira ne’ebé relevante. Nia mós hetan formasaun ba treinadór, ne’ebé organiza husi FFTL, iha tinan 2022.

Romana ne’ebé joga iha pozisaun médiu no nu’udar kapitaun nunka hakiduk iha nia pasu atu aprende hodi hadi’ak liutan nia abilidade. Dezde envolve iha Buibere, Romana konsege rekolla premiu sira rua ho títulu markador topu no mellor jogadora iha epoka ne’ebé diferente.

Romana mós iha ambisaun boot atu hetan títulu seluk iha jogu sira internasionál, ne’ebé Timor-Leste nia ekipa femininu partisipa iha futuru. Nia kontinua haka’as an iha forsa fízika no hariku nia táktika futebol liuhusi treinu iha selesaun nasionál femininu.

-RP